
帝洛巴大師教言集TILO17ཆོས་དྲུག་གི་མན་ངག
1-7-13b

༄༅། །ཆོས་དྲུག་གི་མན་ངག
༄༅། །རྒྱ་གར་སྐད་དུ། ཥཌ་དྷརྨ། ཨུ་པ་དེ་ཤ་ན་མཿ བོད་སྐད་དུ། ཆོས་དྲུག་གི་མན་ངག་ཞེས་(ཅེས་)བྱ་བ།
དཔལ་བདེ་མཆོག་འཁོར་ལོ་ལ་ཕྱག་འཚལ་ལོ། །དལ་འབྱོར་རྒྱུ་འབྲས་ལས་རྣམས་ལས། །དལ་འབྱོར་དོན་གྱི་སྙིང་པོ་རྩལ། །རྣལ་འབྱོར་ལུས་ཀྱི་རྩ་ཡི་ཚོགས། །ཕྲ་རགས་རླུང་དང་ལྡན་པ་ཡིས། །དབང་དུ་བྱེད་ཐབས་འཁྲུལ་
1-7-14a

འཁོར་གྱིས། །དབྱུང་རྔུབ་དགང་དང་གཞིལ་བ་སྟེ། །ལ་ལ་ན་དང་དྭ་པ་ན། །ཨ་ཝ་དྷུ་ཏིའི་འཁོར་ལོ་བཞི། །ལྟེ་བར་ཙཎྜ་ལིའི་མེ། །ཕྲ་རབ་ལས་འཕེལ་ཧ་ལས་ནི། །བདུད་རྩིའི་ཆུ་རྒྱུན་དགའ་བཞིའི་འགྲོས། །རྒྱུ་མཐུན་
ལ་སོགས་འབྲས་བུ་བཞི། །འཁྲུལ་འཁོར་དྲུག་གིས་རྒྱས་པར་བྱ། །ཙཱརྱ་པའི་གཏུམ་མོའི་ཨུ་པ་[གཏུམ་མོའི།] དེ་ཤའོ། །སྣོད་བཅུད་ཁམས་གསུམ་མ་ལུས་པ། །སྒྲུ་མ་རྨི་ལམ་ལ་སོགས་དཔེས། །འགྲོ་འདུག་སྤྱོད་ལམ་ཀུན་ཏུ་སྦྱང་། །ལྷ་ཚོགས་སྒྱུ་མ་མེ་
ལོང་གཟུགས། །རྡོ་རྗེ་སེམས་དཔའ་ལེགས་བྲིས་པ། །གཟུགས་བརྙན་བསལ་(གསལ་)བར་སྣང་དང་མཚུངས། །དེ་ཉིད་སྒྱུ་མའི་གཟུགས་བཞིན་དུ། །སྒྱུ་དཔེ་བཅུ་གཉིས་ལྟར་མཐོང་བ། །རྣལ་འབྱོར་སྒྱུ་མའི་དོན་མཐོང་བའི། །ནཱ་ག་
རྫུ་ནའི་ཨུ་པ་དེ་ཤའོ།[སྒྱུ་ལུས་ཀྱི་] །རྨི་ལམ་རྨི་ལམ་དོན་ཤེས་ཤིང་། །རྒྱུན་ཏུ་(དུ་)ཟབ་པའི་དོན་བསྒོམ་པ། །ནཱ་ད་ཐིག་ལེ་ལ་སོགས་པས། །རིག་ལྔའི་ས་བོན་ལ་དམིགས་ནས། །སངས་རྒྱས་ཞིང་དང་སངས་རྒྱས་བལྟ། །གཉིད་དུས་བདེ་ཆེན་
བསྒྲུབ་པའི་ཐབས། །ལ་བ་པའི་ཨུ་པ་དེ་ཤའོ།[རྨི་ལམ་གྱི།] །རྣལ་འབྱོར་ཨ་ཝ་དྷུ་ཏཱི་པ། །ཨ་ཝ་དྷུ་ཏིར་སེམས་གནས་པས། །སྙིང་གི་ཐིག་ལག་ལེར་སེམས་གནས་བརྟེན་པས། །འོད་དང་འོད་ཟེར་འཇའ་རིས་དང་། །སྐྱ་རེངས་ཉི་འོད་ཟླ་
འོད་དང་། །ཉི་མ་ཟླ་བ་ཤར་འདྲ་དང་། །ལྷ་དང་སྐུའི་(ཡི་)སྣང་བ་སོགས། །སྣ་ཚོགས་ཞིང་ཁམས་དག་པར་འགྱུར། །རྣལ་འབྱོར་པ་ཡི་ལམ་ཆེན་དེ། །ནཱ་ག་རྫུ་ནིའི་ཨུ་པ་[འོད་གསལ་གྱི།] དེ་ཤའོ། །རྣལ་འབྱོར་འཆི་བའི་དུས་ཀྱི་ཚེ། །དབང་པོ་རྣམས་དང་འབྱུང་
1-7-14b

བ་བསྡུད(སྡུད)། །ཟླ་ཉི་རླུང་རྣམས་སྙིང་ཁར་འདུས། །རྣལ་འབྱོར་ཏིང་འཛིན་སྣ་ཚོགས་འཆར། །རྣམ་ཤེས་ཕྱི་རོལ་ཡུལ་སོང་ན། །རྨི་ལམ་ཡུལ་བཞིན་སྣ་ཚོགས་སྣང་། །བདུན་བདུན་དུས་ཚེས་འཆི་སྣང་དང་། །དེ་ནས་སྐྱེ་བར་འགྱུར་བ་
ཉིད། །དེ་ཚེ་ལྷ་ཡི་རྣལ་འབྱོར་བསྒོམ། །ཡང་ན་དེ་ཉིད་ངང་ལ་བཞག །དེ་རྗེས་སྐྱེ་ལ་ཕྱོགས་པའི་ཚེ། །མངའ་བདག་ལྷའི་རྣལ་འབྱོར་གྱིས། །སྣང་སྲིད་ལྷ་ཡི་རྣལ་འབྱོར་བསྒོམ། །དེས་ནི་བར་དོ་ཁེགས་པར་འགྱུར། །པུ་ཀ་སིདྷིའི་
ཨུ་པ་[བར་དོའི།] དེ་ཤའོ། །དེ་ལས་རྣལ་འབྱོར་འཕོ་བའི་ཚེ། །གྲོང་འཇུག་ལྷ་དང་ས་བོན་གྱི། །འགྲོ་འོང་རིང་དང་ཐུང་བ་དང་། །ལྷ་ལ་སླབ་(བསླབ་)ཅིང་འཕར་བའི་དུས། །གང་འདོད་གྲོང་དུ་འཇུག་པར་བྱ། །གོང་དུ་འཕོ་ན་སྟོང་ར་ལྷ། །ཡཾ་སྤྲོད་ཧི་ཀ་
ཧཱུཾ་དང་ཧཱུཾ། །ལྷ་དང་བླ་མའི་ཐུགས་ཀར་འཕང་། །དེས་ནི་འདོད་པའི་གནས་སུ་འཕོ། །པུ་ཀ་སིདྷིའི་ཨུ་པ་[འཕོ་བའི།] དེ་ཤའོ། །གྲུབ་པའི་རྣལ་འབྱོར་གྱི་དབང་ཕྱུག་ཏིལླི་པའི་ཞལ་སྔ་ནས་མཛད་པ་རྫོགས་སོ།། །།
རྒྱ་གར་གྱི་མཁན་པོ་ན་(ནཱ་)རོ་པཎྜི་ཏ་དང་། བོད་ཀྱི་ལོ་ཙྪ་བ་མར་པ་ལྷོ་བྲག་པ་ཆོས་ཀྱི་བློ་གྲོས་ཀྱིས། ཁ་ཆེའི་གནས་པུ་ལཱ་ཧ་རིར་བསྒྱུར་ཞིང་གཏན་ལ་ཕབ་པའོ།། །།
1-7-15a

ཕྱུག་ཆེན་པོ་ཀུ་མཱ་ར་ཤྲིས། དཔལ་ན་ལན་དའི་གཙུག་ལག་ཁང་དུ། སཾསྐྲྀཏའི་སྐད་དུ་མཛད་པ་རྫོགས་སོ།། །།


目錄
ཆོས་དྲུག་གི་མན་ངག